كشفت إحدى صديقات اليوتيوبر الشابة مي عبد الرحمن بعد العثور على “عمل سحر مدفون” يحمل اسمها وبصورتها التى ترتدي القميص الخاص بفريق نادي الإسماعيلي.
أثناء حملة لتطهير المقابر بالإسماعيلية، عثر بعض الأشخاص على صورة اليوتيوبر مي عبد الرحمن ، ودونت صديقتها عبر حسابها على “فيس بوك”: “الصور دي هتكون صدمة لناس كتير أوي، القصة بدأت من حوالي 3 أسابيع، أنا ومي كنا مترددين نقول أو منقولش، الحقيقة لحد لما توصلنا لقرار نقول بس استنينا العيد يخلص، الحقيقة من حوالي 3 أسابيع مسدج اتبعتت على صفحة على فيس بوك فيها صورة ومسدج مع الصورة مكتوب فيها إن كان فيه حمله تطهير للمقابر من الأعمال المدفونة في مدينة أبو كبير محافظة الشرقية”.
وأضافت:”لقوا الصورة دي ومعمول عمل للبنت صاحبة الصورة وأنهم بعتوها على صفحات إسماعيلية لأن البنت في الصورة لابسة تيشيرت الإسماعيلي وهما ميعرفوش مين دي، الأدمن محمد الورواري عرف مي طبعا من الصورة لأنه متابع فيديوهاتها هي وشمبر، وعارف مي كويس، ليتواصل مع أدمن الصفحة بتاعة مي وكلمهم، أنه عاوز رقم مي علشان يكلمها، وتم التواصل مع مي، وكانت صدمة مي أول لما عرفت كلمتني اليوم ده”.
وتابعت : “كانت صدمة بالنسبة لينا أحنا الاتنين، لأن أحنا كنا دائما بنهزر في الموضوع ده ونتكلم أنا وهي كده في لحظات الصفا اللي هو يابنتي كل الناس عمالة تتجوز أكيد أنا وأنتي معمولنا عمل، وكنا بنهزر دايما في موضوع الأعمال دى مكناش متخيلين أن الموضوع قلب جد وأن فيه عمل معمول لـ مي.. وأنا كنت اكتشفت أن أنا كمان معمولي عمل وكأننا صبرنا ونولنا باين ولا إيه المهم العمل ده الناس أصحاب الحملة مشكورين وربنا يجازيهم خير فكوه العمل ده عمل سفلي كان ييتجدد كل شهر الحمدلله العمل ده أنفك بس لسة في عمل كمان أحنا مش عارفين مكانه زي مانتو شايفين مكتوب ع الصورة مرض وكره وحاجات كده كتير، طبعا هتقولوا مي سليمة مفيش فيها حاجة هقولك شوية عن الحاجات اللي في مي».
وأشارت: “عندها شوية أمراض كده خفيفة، طبعا أحنا عارفين (ولا هم بضارين به من أحد إلا بإذن الله) بس دي شوية من الحاجات اللي حصلت لمي في الفترات الأخيرة بسبب الزفت ده وكلها أمراض بدون أسباب واضحة موت عصب الأذن اليسرى وعدة جلطات بالرئة وقعدت شهرين على تنفس بدون أي سبب و4 فقرات في الضهر.. دول بسببهم مي بتفضل نايمة على ضهرها عاجزة تماما عن الحركة بجانب مشاكل صحية تانية، وإن شاء الله تعدي على خير وتكون خير طبعا، مي عمرها ما أذت حد ولا زعلت حد وطول عمرها بتساعد كل الناس وأي حد يطلب منها خدمة مي بتعملها علي طول، ادعوا لمي أن ربنا يزيل الهم اللي هي فيه وادعمو مي وقولوا حسبي الله ونعم الوكيل في اللي بيأذي أي حد”.
وقبل عام كشف الحساب الرسمي لليوتيوبر مي عبد الرحمن إصابتها بجلطة في الرئة وكتب الحساب “ناس كتير بتسأل على حالة مي.. ادعولها ربنا يشفيها ويعدي الابتلاء ده على خير، الأشعة الجديدة بينت إنها عندها “جلطات على الرئة” وده اللي مسبب لها ضيق تنفس وحالتها الصحية مش مستقرة نهائي.. كثفوا الدعاء ليها.. أدمن”.
Discussion about this post