تقدم أحد رواد مواقع التواصل الاجتماعي بشكوي من توكيل “فولفو عز العرب” ،مؤكدا أن التوكيل تسبب في حريق سيارته بعد أن قام التوكيل بعمل صيانة للتكيف الخاص بالسيارة.
وكتب عبر موقع التواصل الاجتماعي فيس بوك: “عربيتي ولعت وانا ماشي والنار خلتها حتة حديدة بعد ماطلعت من توكيل فولفو عز العرب علشان كنت بعمل صيانة للتكييف والحمد لله لحقت اطلع منها.. عزالعرب بيقولولى بمجرد انك مضيت باستلام العربيه لو ولعت قدام باب التوكيل برده مش قصتنا بمجرد استلامك العربية و خروجك من باب التوكيل بيخلى مسؤليتنا تماماً “.
وسرد بداية الواقعة، قائلا: ” لما روحت يوم ٢٦\ ٧ اللي فات اعمل صيانة لتكييف العربية وبعد ماخرجت من التوكيل وطلعت على الطريق لقيت فجأة النار بتطلع من الكبوت فنزلت جري وأول مانزلت النار مسكت فى كل حته فى العربية وانفجرت مالحقتش أخد أي حاجة من العربية ، وشوفت الموت بعيني وأنا راكب العربية اللى المفروض أنها أكتر أمانًا في العالم، بسبب إهمال توكيل عز العرب .. واتعمل محضر اثبات الواقعة برقم ١٥١٩ جنح رأس غارب”.
وأكمل : “وبناءا على قرار النيابة العامة طلع تقرير من الأدلة الجنائية بيقول ان السبب في الحريق هو ماس كهربا فى الوصلات اللى على شمال الموتور قدام و أنت واقف قدام العربية أدى إلى اشتعال الموتور و العربية بالكامل بدرجات متفاوتة الشدة و ده مكان الكمبريسور ووصلات للتكييف “ده المكان اللي اتعمل فيه الصيانة جوا مركز عز العرب فولفو”
واضاف :”روحت التوكيل علشان اعرفهم اللي حصل و اشوف هايعملوا ايه فى الكارثة اللى عملوها دى وشوفت أسوا خدمه ما بعد البيع في حياتى وبيقولولي لو كانت ولعت فى التوكيل كان ممكن نساعدك جحود غريب الصراحة في ردودهم كلها .. غير تنصل من المسؤولية رغم أن تقرير الأدلة الجنائية في المحضر يثبت مسئوليتهم الكاملة عن الواقعة واللي هو أثبت أن مصدر النيران هو وصلات الكهربا اللي موجودة على شمال الموتور قدام ودي المنطقة اللي اشتغلوا فيها بالظبط، ومش عايزين يعترفوا انها مسئوليتهم، بيقولوا الامضاء بتاعتك بالاستلام بتخلى مسوليتنا تماماً”.
واختتم حديثه: لما انتوا مش مسؤولين عن صيانتكم وعربياتكم بتدفعونا الفلوس دى كلها فى العربيات وصيانتها ليه ؟!!
Discussion about this post