محمد رياض: عملت مدرس كيمياء.. والمدير رفدني بسبب “البنات”

حل الفنان محمد رياض ضيفاً في برنامج معكم مني الشاذلي الذي تقدمه الإعلامية مني الشاذلي عبر قناة cbc، وتحدث عن تفاصيل في حياته الشخصية.

قال محمد رياض: إنه تخرج في كلية العلوم، وكان يحب مادة الكيمياء، والتحق بقسم الأبحاث والتطوير في إحدى الشركات، ووصل لدرجة أنه اخترع بعض المركبات وأطلق عليها اسمه.

وتابع محمد رياض: ” أنا اخترعت حاجات والله العظيم عملت حاجات باسمي قبل ما أسيب الشركة اللي كنت بشتغل فيها، سبتها لأن خلاص مكنش هينفع أكمل عشان التمثيل، وكنت شغال في الأبحاث والتطوير بتاع الشركة”.

وأكمل: “أنا كنت لسه متخرج من كلية علوم وشغال كيميائي الصبح وبشتغل في معمل تحاليل وبشتغل في مدرسة بنات 3 أيام في الأسبوع لكنهم رفدوني”.

وواصل: “كنت لسه صغير عندي 22 سنة وشعري أصفر وحليوة وبروح لابس تيشيرت وبنطلون جينز.. وأول ما دخلت المدرسة لقيت الطابور بقى فيه همس.. بنات بقى كلهم 18 سنة وعمالين بيتكلموا مين ده وبتاع”.

و أوضح: “شوية ودخلت الفصل لقيت كله بنات وقاعدين جنب بعض بين الديسكات وزحمه، طلع إن البنات جم من فصول تانية يحضروا حصة الكيميا.. يعني المفروض الفصل 25 بـنت لقيت عندي 60 بنت.. وتقريبا الكيميا أحلوت في عينهم ساعتها”.

واضاف محمد رياض: “المدير قالي أنت شخص كويس جدا ومدرس هايل ولا غبار عليك، بس أنت مش هينفع تكمل معانا.. أنا عندي بنات صغيرين ومينفعش احط الزيت جنب النار.. واترفدت من غير ما أعمل حاجة”.