عميل يحذر من بنك QNB: أوعى تفكر تتصرف في مبلغ أودعته إلا بعد يومين لأنه هيعتبرك اتصرفت فى فلوس سلف من البنك

تقدم عميل بشكوى من البنك الأهلي القطري QNB، وذلك عبر صفحته الرسمية بموقع التواصل الاجتماعي فيس بوك.

وقال العميل : تحذير من خصومات عجيبه من بنك QNB، فوجئت وانا بشوف رصيدي عن طريق Instapay ان رصيدي بالسالب!، وأنا اصلا حساب جاري والكارت اللى معايا Debit Card .

وتابع: “فدخلت أشوف إيه الموضوع، لقيت مخصوم عليا مبلغ OVERDRAFT COMMISSION و مخصوم DEBIT INTERESTS !”.

وأكمل: “طبعا ما فهمتش أى حاجه، اتصلت بيهم وبعد 3 ساعات تقريبا الحمد لله عرفت اكلمهم وكان الرد، أن لو عملت إيداع من ال atm تستنى يومين قبل ما تقدر تتصرف في الفلوس دي لا تحولها لحد ولا تسحبها، اللى هى فلوسك، واللى انت حاطتها بايدك في ال atm

ولو اتصرفت فيها قبل اليومين هيعتبرك اتصرفت في فلوس سلف من البنك، تخيل بتستلف الفلوس اللى كانت في ايدك وحطيتها بنفسك في الماكينة .. وينزل عليها عمولة، مش بس كده.. عمولة وفايدة”.

وأوضح: “و لو عملت إيداع في الفرع بتاعك هيتكرموا عليك ويبقى يوم واحد قبل ما تقدر تتصرف في فلوسك.. ولو عملت إيداع في فرع مش فرعك جوه المحافظة بتاعتك يومين، ولو من فرع بره محافظتك 3 أيام.. ودي يا سيدي آخر صيحات الخصومات من البنك ده”.

وتابع: “عندي حساب في بنك تانى مش هقول اسمه بعمل إيداع واحول بعدها بدقايق ومفيش الكلام ده.. تحذير علشان محدش يحصل معاه كده ما يبقاش عارف الخصومات دي إيه.. ما تعملش ايداع في حسابك في QNB وتفكر تتصرف في المبلغ اللى اودعته”.

واضاف:” تم التواصل مرة اخري من قبل أحد مسؤولي خدمة العملاء وأكد مرة تانية أن دي سياسة البنك ولكن أكد أن التحويلات على instapay اللى هو التحويل اللحظي لا يخضع لفترة الإستحقاق.. وأن لو اتحول لك عن طريق instapay تقدر تسحبهم بعدها مباشرة أو تحولهم دون وجود عمولة أو فوائد” .

واختتم حديثه: “الإبداعات بكل أشكالها فى الفروع أو عن طريق atm هى اللى لها فترة استحقاق لو اتصرفت في المبلغ قبلها هينزل عليك عمولة و فايدة” .