تداول أحد رواد مواقع التواصل الاجتماعي شكوي احد الاعضاء من مستشفيي الجابري عندما ذهب مع زوجته للولادة في مستشفي الجابري مما ادي لوفاة طفله وجاءت التفاصيل كالاتي:
“يوم ١٦ يناير زوجتى كانت بتعمل عملية ولادة عندهم، دخلت ع الاستقبال عشان اخلص اجراءات الغرفة اول حاجه لقيت الموظفة بتدينى دفتر التسجيل وقلم وبتشاورلى على نقطه نقطه، اكتب هنا اسمك، واكتب هنا ولاده طبيعى واكتب هنا مش عارف ايه!”
وتابع “قولتلها المفروض انكم معاكم البطاقة وبتسجلوا البيانات كلها والاخر بتدينى عشان امضى واتطلع ع المكتوب كله، دى حاجه”
واستطرد “بعد ما طلعنا فوق سملنا الملف للموظفه المسئوله عن الغرف او التمريض، راحت بمنتهى الثقه عاملالى روشتة علاج عبارة عن حقن تقريبا وانزل هاتهم من الدور اللى تحت، تمام نزلت تحت ودفعت واستلمت الحقن وطلعت للدكتورة اللى اتفقنا معاها تنفذ العملية، قالت انها مش عايزه الحقن دى وكتبت غيرها”
وأكد رفض المستشفى استرجاع الادوية “نزلت جري ارجع الحقن القديمه لنفس المكان اللى استلمت منه، لا اصل حضرتك هتدخل عند الاستاذ فلان اصل احنا مش بنرجع هنا، قالى ازاى؟ انت بتروحلهم مكان ما دفعت وترجع فلوسك، قولتله هما بعتونى ليك، طب استنى استاذ محمد اهو هيخلصلك المشكلة، طبعا مفيش وقت قولتلهم معاكم الايصال ممكن تحلوا المشكله مع بعض لحد ما اروح اجيب الحقن المطلوبة من برا وارجع، لأنها مكانتش متوفره عندهم، الحمد لله اشتريت الحقن وسلمتها للدكتوره عشان يبدأوا اجراءات العملية”
وأشار علي رفض المستشفى تقديم بيان تفصيلي بالخدمات المقدمة قائلاً ” زوجتى داخله معايا فى التأمين الطبى، الاول كنت ناوى ادفع كاش واسترد فلوسى من التأمين بعدين، نزلت للاستقبال تحت، وانا واقف معاهم عرفت بالصدفه انهم متعاقدين مع اكسا، دخلت للحسابات وطلبت منهم ادفع كاش بس استلم بيان تفصيلى بأسعار الخدمات اللى قدموها”
وواصل ” الموظف المحترم قالى لأ اصل مش متاح عندنا نعمل كده، انا هعمل لحضرتك فاتورة الكترونية بإجمالى المبلغ، قولتله الفاتورة الالكترونية دي اجراء خاص بيكم للضرايب وانا محتاج بيان على ورقة المستشفى بالخدمات ومختومه وبس، وده حقى مش بطلب منكم حاجه اصافية وفلوسكم هتاخدوها كاملة”
وواصل “قولتلهم طيب هجيبلكم موافقه شامله تكاليف العملية، قالى العملية داخل الموفقه هتكلف ٢١٠٠ج غير شامله تكاليف الجراح وحضرتك هتدفع معاها كاش ٨٥٠ج شاش وتخدير… الخ”
واستطرد “قولتله بالنسبة لتكاليف الجراح تمام، اما عن الموافقه فأنا كلمت شركة التأمين وقالوا انها شامله جميع التكاليف حتى ٧٠٠٠ج وانى مش المفروض ادفع مليم مع الموافقه.”
وأكد انهم رفضوا أعطاه بيان بتفاصيل الخدمات “بعد مناهده كتير اضطريت اقولهم انهم كده فى حاجه بيتهربوا منها ومش عايزين يدونى حقى اللى هو ورقه تفصيلية واضطريت اقولهم انى هضطر ادخل جهات رسمية فى الموضوع”
وتابع ” زوجتى الحمد لله ربنا كرمها الساعه ١٢ظ تقريبا وانا عمال الف حوالين نفسى فى الدوامه اللى مستشفى الجابرى حطونى فيها، لا عايزين يقبلوا كاش ويسلمونى بيان تفصيلى ولا عايزين يقبلوا موافقه التأمين حتى ٧٠٠٠ج بدون فلوس زيادة”
وأشار الي دخول ابنه الحضانه دون سبب ادعي “دخلت اتطمن على زوجتى والمولود، قالوا انه دخل الحضّانه، طب ليه؟ قولت يمكن ده اجراء روتينى وشوية وهيجيبوها، فات ساعه ورجعت لزوجتى عشان اشوف المولود، لسه مجاش برضو”
واكمل مؤكداً علي كلام الدكتور اخدت اخويا ونزلت اشوفه، شويه والدكتور خرجلنا، وقالى كالتالى:
بص حضرتك المولود بيعانى من ضيق تنفس من الدرجه الرابعه وعنده فتق فى الحجاب الحاجز والمعدة والامعاء قافلين ع الرئتين ومحتاج عملية جراحية ولازم تقولنا حالا هتقرر ايه عشان لو كده هنحطه على جهاز تنفس ونعمله اشعه ع الصدر وهتروح تدفع تمن الاشعه وتسيب ١٠,٠٠٠ج فى الخزنه تحت الحساب”
واختتم انه تم نقل زوجته لمستشفي اخري قائلاً “طلبت اسعاف ونقلت المولود لمستشفى تانيه وطلعت سملتهم موافقة التأمين حتى ٧٠٠٠ج غير شامله تكاليف الجراح ودفعت برضو ٨٥٠ج عشان هما نصابين ومش عايزين يدونى حقى زى ما بياخدوا حقهم”
“وكدابين عشان كاتبين فى اخطار الولاده ان حالة المولود جيده بالرغم من حالته، لله ما اعطى ولله ما اخذ وكل شئ عنده بمقدار، المولود توفي تانى يوم.”
Discussion about this post