كشفت فتاة تدعى نيرمين الطنطاوى باحثة مصرية، عن خداع شاب لها عن طلب الزواج منها ومتزوج سيدة تشيكية.
وقالت نيرمين : “من فترة اتعرفت على محسن وارتبطنا..و بعد فترة قصيرة جدًا بدأت اكتشف حجات غريبة، زي انه مثلا بيقابل ست من ورايا وبيتصور معاها ويقول من الكلام المعسول ما يكفي، وفي الاخر يقولي معرفهاش”.
وتابعت : “عدينا المرة الاولى لجل مراية الحب و الصدق والدموع الي كانت في عينه، ولكن بعدها بيوم، يوم فقط حرفيًا، جت لي رسالة من صحفية محترمة بتنبهني فيها ان محسن خاين، وان هو بيقابلها في نفس الوقت الي بيقابلني فيه، وعلى علاقة بيها في نفس الوقت الي على علاقة بيا فيه، وقت وصول الرسالة كنت مصدومة، لأن هنرجع فلاش باك لكلام محسن معايا، وانه عاوز يتجوزني، في اقصى سرعة، وانه مش متخيل حياته من غيري، وان يلا حددي معاد مع بابا، وهل ممكن اقابل ماما النهاردة؟ وكثير من الكلام حول ترتيب شغل ثابت عشان يقدر يوفر عيشة هنية وحياة زوجية سعيدة”.
وأكدت : “طبعا مما دفعني اني اكلم اهلي عنه، واحكيلهم انه هيتقدم في خلال الشهور الجاية، نظرًا لمحاولاته المستميتة في اني اعرف كل الي حوليا، بس في نفس الوقت، هو قلي انه كان مرتبط بست تشيكية(ارتباط لا يتعلق بالجواز لا العرفي او الرسمي، وحسب كلامه ان العلاقة منتهية) وانها تكبره بسنوات، وانه مبيكنش اي مشاعر حب ليها، وانه منفصل عنها بشكل صوري، ولكن هو مصدق لقى نفسه معايا وعاوز يعيش حياته معايا، وبدأت رحلة كتابة الشعر، و كثير من الكلام اللطيف، والمشاعر الي تبان مفيش اصدق منها، غير انه كل يوم بيأكدلي انه نهى علاقته بيها(العلاقة الي هي مش جواز)”.
وأكدت : “ثم اكتشف اليوم الخبر العظيم.. انه متجوز الست التشيكية دي (بعقد جواز رسمي مش عرفي زي ما قال لي بعد ما انكر في البداية انه متجوزها، بعدها قلي دي ورقة عرفي فقط، بعدها اتبعت لي ورقة الجواز الرسمي ) ، والي عرفت انها بتصرف عليه، وكمان لقيت محادثاته معاها عن انه ميقدرش يعيش من غيرها، وميقدرش يعيش من غيري، ومن غير خمسة سبعة تانيين، وعرفت قد ايه الست دي بتحبه فعلا، ولكنها متعرفش انه بيخونها، وغيرها بيتخانوا مع غيرها ويكتمل السيكونس.. وطبعًا قلي قد ايه هو بيكره الست دي، وقد ايه هو بيكره غيرها وغيرها، ومع ذلك مش دا الي بلاقيه في نصوص محادثاته، بل بيكون كلام كله حب وتقرب ومحاولات لأيقاع الكثير من البنات، دا غير انه مش بيتقرب لأي حد، يعني طبعًا كلنا عارفين ان محسن محمد هو الحائز على جائزة افضل ديوان شعر في دورة المعرض السنة دي، ونعرف قد ايه هو بيحاول يتسلل للوسط الثقافي، ولنسائه، عن طريق ديوانه وافكاره التقدمية، و غيره وغيره.. انا عارفة ان دا شخص رخيص جدًا والكلام عنه نقص من وقتكوا اربع دقايق كان ممكن تعملوا فيها شئ افضل، لكنها محاولة للتوعية ولأني مقدرتش اشوف بنت مجروحة من هذا الحثالة.. وشكرًا”.
Discussion about this post