حذرت فتاة من التعامل مع شركة طلبات Talabat الخاصة بطلب الطعام عبر الانترنت ،مشيرة إلي أنها تعرضت للسرقة والنصب من الشركة .
حيث كتبت عبر موقع التواصل الاجتماعي فيس بوك ،قائلة : انا بحذر كل الناس من التعامل مع طلبات و محاولة استعمال كارت الفيزا في الشراء..يوم ٦ يوليو حاولت اعمل اوردر مرتين بالفيزا من الدهان، العملية ما تمتش ، فعملت الأوردر كاش و أتقبل ، و قبل وصول الديليفري جالي رسالة من البنك أن تم سحب المبلغ ، تواصلت مع طلبات و قالولي خلاص استلمي الأوردر بدون دفع عشان هو أدفع فيزا ، و فعلا استلمت الاوردر “.
وتابعت:” و بعدها رجعوا كلموني تاني و قالولي أنهم هيبعتوا الدليفري تاني لأن الأوردر كان كاش اللي اتقبل، و ده بيعملهم لخبطة، فطلبوا إني ادفعه كاش و هيتم رد الفلوس فس حساب البنك ،و فعلا دفعت كاش و تاني يوم كلمت البنك و البنك أكد سحب الفلوس بالفعل و انتظرت المبلغ يرد و مفيش حاجة جت “.
وواصلت :”كلمتهم ٤ مرات بعدها، كل مره يقولولي الفلوس هترد و رفعنا شكوى للقسم المختص و هنرد عليكي ، و طبعا ولا في رد ولا حاجة .. أخر حاجة امبارح بعت إيميل شكوى و كان ردهم كالآتي: مفيش مبلغ اتسحب أساسا و أعلمي سكرين شوت للمعاملة البنكية و ابعتيه”.
وأفردت : “عملت سكرين شوت للمعاملة البنكية من موقع البنك نفسه و أنها معاملة مقبولة و كلمت البنك و جبت رقم المعاملة البنكية authorization code اللي بيها هما يشوفوا المعاملة عندهم .. بعتلهم كل الكلام ده ، عشان يكلموني في التليفون و يطلبوا لما كشف الحساب يطلع آخر الشهر ، عايزني أروح البنك و أطبعه ورق و أصور الورق اللي يثبت! ..طب ده أنا واخدالك سكرين شوت من البنك نفسه و بعتلك الكود بتاع عملية السحب اتعبوا بس شوية و أعمل سيرش عندك..طب قولتولي أن الفلوس فعلا أتسحبت ليه بقى؟ و ادفعي و هنرجعها”.
واضافت:”كان رد الأستاذة الصادم: معندناش محادثة تليفونية مسجلة بكده!!!! و مفيش فلوس أتسحبت
قولتلها: هو المبلغ ١٥٤ جنيه ، أنا مش عايزاه، و مش هتعامل معاكم تاني، و هنزل كل ده على السوشيال ميديا
في الصور السحب من الفيزا من البنك و أن المعاملة ناجحة و الريسيت مكتوب فيه كاش و جزء من الايميلات و الكود بتاع البنك “.
وتابعت : نصيحة لوجه الله لأي حد بيتعامل مع طلبات ، أدفع كاش فقط و شيل اي كارت مسجل عندهم لأنك هتتسرق أكيد..للاسف انا كنت بتعامل مع Talabat بس دي اخر مرة أتعامل معاهم انا و عائلتي كلها ..ممكن يكون ١٥٤ جنيه مبلغ بسيط بالنسبة للناس بتوع كبري دماغك ..بس ان يضحك عليا كده و تبقى سرقة علني “.
واختتمت حديثها: “أنا عملت شكوى في حماية المستهلك و شكوى عند البنك كمان لأستخدام طلبات الكريدت كارد و مطالبه من البنك رسمية لرد الفلوس.. الحمدلله بعد تدخل جهاز حماية المستهلك طلبات رجعوا الفلوس”.
Discussion about this post