قامت الإعلامية ياسمين عز بتوجيه عدة النصائح للسيدات المتزوجات في كيفية التعامل مع أزواجهن قبل مباريات القمة بين الأهلي والزمالك.
وقالت ياسمين عز: “الماتشات دي لها طقوس خاصة في البيت، لو اتصلتي بخطيبك أو بعتي له رسالة على الواتس، ومردش عليكي، ماتزعليش منه أرجوكي لأنه في دنيا غير الدنيا، لو جوزك معرفش ينام الليلة دي ماتستغربيش، مش عشان عنده أرق أو بيفكر في واحدة تانية غيرك، هو بيفكر في نتيجة ماتش بكرة”.
وتابعت ياسمين عز خلال برنامجها “كلام الناس” المُذاع عبر شاشة “MBC مصر”:” بلاش تصدري له مشاكل أو تطلبي منه طلبات ملهاش لازمه، مش لازم تفتكري في يومين ماتش الاهلي والزمالك تفتكري أن التلاجة مافيهاش صلصة، ولا عين البوتاجاز الصغيرة مسدودة والمفروض يسلكها، أو الحلة التيفال اللي نستيها عند مامتك من آخر عزومة عايزاها عشان تسلقي الكرنبة، اسلقيها في أي حلة يا مدام، هو يا حبيبي عنده عرض طارئ اسمه (القمة فوبيا) وبيفكر لا قدر الله لو فريقه اتغلب هيهرب فين من تحفيل صحابه ولو فرقته اتغلبت متبقيش أنتي والزمن وصحابه عليه”.
وواصلت: لو فرقته اتغلبت، اوعي تقربي منه لمدة 3 ايام، من بعد صفارة نهاية المباراة، أما لو جوزك فريقه كسب يا سعدك يا هناكي، هتلاقيه اتحول لعفريت مصباح علاء الدين فجأة، لو كان قايل لك من ساعة مش معايا فلوس هتلاقيه معاه وبيديلك، حاولي في الساعتين اللي بعد الماتش تبلغيه بأي خبر وحش كنتي مخبياه عليه.
واكملت: ولو جوزك زملكاوي عمره ما هيخونك وعنده وفاء وإخلاص عمرك ما هتلاقيه، وأقل كلمة بتفرحه، ويعشق المتعة بصرف النظر عن النتيجة والشكل الحلو بيفرق معاه وبيحسس اللي حواليه أن قطته جمل وبيهتم بالتفاصيل.
أضافت: الرجل الأهلاوي أصيل ومش بيقبل غير بالمركز الأول، وعنده قوانين صارمة وبيركز على هدفه، وبيحتفل بمناسبات غريبة بتخلد أمجاده زي أول مرة عملتيله بطة بالبرتقال”.
وتابعت : “الرجل الأهلاوي لو شلتيه في عينيكي هيطبق عليكي كل شعارات التالتة شمال وهيهتف بيكي وهيقولك من صغري أعشقك وعشانك يا غزال أهز جبال، والراجل سواء زملكاوي أو أهلاوي مفيهوش عيوب وكلهم طعمين وهايلين”.
Discussion about this post